SiggiMagg

Rann á fætur rúmlega tíu.  Morgunmatur, kaffi og vindill.

Skrifaði þessar línur um gærdaginn og lagaði “nýyrðið” sem ég bjó til óvart á fimmtudeginum - orsökum hafði orðið að “orðakökum”, mig hefur greinilega verið farið að lengja eftir jólasmákökum

Hvað svo - jú - til Péturs í kjallarann.  Það gengur ágætlega undan okkur í að klæða, en hellingur af vinnu eftir enn.

Plokkfiskur þegar heim var komið - ljómandi góður - og fiskurinn frá honum nafna.

Sjónvarpsgláp fram eftir kvöldi, smá öl með :)  Morgundagurinn verður ugglaust strembinn: a) Sigrún kemur heim grjótsnemma b) til Péturs, og, það allra þyngsta - c) vindlarnir lagðir á hilluna….

Var í vinnu fram að hádegi, fór þá í nudd til Elke - afar notalegt

Tók mér frí eftir hádegið (á móti flugferðinni síðasta sunnudag).  Ætlaði að fara beint til Péturs, en Þóra benti réttilega á að það væri nú gustuks verk að ég byrjaði að fara með henni í búð og hjálpa til við að bera fyrsta skammt af jólainnkaupunum.

Mætti til Péturs um fimmleytið, Rikki líka.  Mér tókst að sýna fram á að setja vatnsrör inn í vegg er ekkert svakalega sniðugt …. Rikki reddaði málinu með því að sjóða í gatið

Við kláruðum að klæða hina víðfrægu Norður hlið og vorum komnir heim rúmlega átta.  Þá eldaði ég lasagnette réttinn minn.

Sofnaði yfir einhvurri jólamynd, horfði á Die Hard og reyndi að horfa á The Island - en var orðinn of “sibbinn” til að klára hana af, enda klukkan að verða þrjú.

Var nú hálf rotinpúrrulegur í morgun, lagaðist ekkert við sturtuna.  Fletti sneplum og fékk mér Cheerios og kaffi á eftir - engin munur.

Rólegheitaframvinda í vinnunni fram eftir morgni.

Nanna sendi mér í gærkveldi link á myndirnar hans Péturs á Picasa.  Set linkana hér í mánaðaröð: júní, júlí, ágúst, september, október, nóvember og desember

Luðran plagaði mig meir eftir því sem leið á daginn, þegar ég kom heim úr vinnunni þá lagðist ég á koddann og raknaði ekki við mér fyrr en upp úr 9, maulaði eitthvað lítilræði, horfði á House og fór aftur í bælið.

Þóra og Þangi settu í fyrstu smákökuuppskrift, ég velti mér fram úr um miðja nótt og kannaði afurðina - lofar góðu

Mætti galvaskur til að fá blóðþrýstings-sírita … en einhvernveginn hafði dömunum tekist að klúðra tímapöntuninni þ.a. það verður að bíða fram á næsta mánudag.

Fór þaðan beint í blóðprufu, ákaflega prófessíonal - sitja, bretta, gretta og út.

Mætti til vinnu, Gummi var einn á staðnum, allt í rólegheitum.  Ágúst Gunnar hélt upp á afmæli sitt og bauð okkur hérna á þriðjuhæðinni upp á Sacher tertu og smákökur.

Eftir öll þessi erfiði lagðist ég í fundargerðarritanir - afspyrnu leiðinlegt verk !

Aksturinn heim einkenndist af bið og aftur bið, af einhverjum orsökum tókst mér að vera nær klukkustund heim á leið -sá aldrei neina vitræna skýringu á þvi.

Þegar heim var komið var mættur maður með Playstation tölvu sem okkur leist bærilega á að kaupa, þó var hún ekki alveg eins og við héldum … en vegna þess að okkur tókst að skemma dýra HDMI snúru mannsins þá var ekki annað að gera en að kaupa gripinn - gerðum svosem ágæt kaup, 45 þúsund með 4 leikjum, þar af nýjasti Grand Theft Auto … kannski ég skoði hann eitthvað

Loksins, langt liðið í níu, fór ég yfir til Péturs.  Þrjár plötur fóru á vegg - agalega efnilegt allt saman.

Velti því fyrir mér í gærkveldi hvort ekki væri tími til kominn að setja línur á bloggið - þó ekki væri nema að týna til svona daginn….

Vaknaði um hálfátta (á Brussel tíma), snúsaði fram til átta - sem var ekki alveg alsnjallt.  Var þó mættur á flugvöllinn klukkuíma fyrir brottför (eftir hlaup milli brautarpalla) og kominn að hliði á góðum milli tíma ásamt því að kaupa jólagjöf

Dormaði mest megnis í fluginu, las þó nokkra kafla í “The Lost Continent” eftir Bill Bryson.  Nokkuð skondin bók um ferðalag Bills á æskuslóðirnar - er svona næstum hálfnaður, en hugurinn er farinn að velta fyrir sér hversu lengi hann geti haldið þessari skemmtun út - því þetta er farið að vera nokkuð fyrirsjáanlegt, og, kannski ekki alltaf jafn fyndið og fyrst.

Í fluginu frá Kaupmannahöfn horfði ég á Harry Potter og fangann frá Azkaban, óttalega klént - en ágætis afþreying, held ég hafi lítið sofnað yfir þessu.  Bætti við nokkrum köflum úr bókinni fyrr nefndu.

Í fríhöfninni keypti ég tvær jólagjafir og Haustsól fyrir Þóru - það eru fjallagrasavínpælingar í gangi hjá þeim systrum.

Þangbrandur er í PS3 kaupapælingum og fór nokkur tími í að spegúlera í því - og leita leiða til að fjármagna þau ósköp.

Hálf latur, Pétur kíkti við og mér fannst raunasvipurinn svo mikill á honum að ég lagði ekki í annað en að mæta í kjallarann.  Við Rikki náðum að setja fyrstu spónaplötuna á Norður-vegginn, þá eru bara 32 eftir…

Ætli ég reyni ekki að fara snemma í bælið, blóðprufa og blóðþrýstingssíriti á morgun - fastandi, eins gott að muna það!